බළන්ගොඩ ප්‍රදේශයේ සිට අනුරාධපුර වන්දනාවේ පැමිණි බස් රථයක් විශ්‍රාමශාලාවක් තුල නවතා තිබියදී අද (22දා) අළුයම හදිසියේ ඇති වූ ගිනි ගැනීමක් හේතුවෙන් එම බස් රථයේ නිදා සිටි පුද්ගලයකු ජීවිතක්ෂයට පත්ව එම බස් රථය සම්පූර්ණයෙන්ම විනාශයට පත්ව ඇති බව අනුරාධපුර මූලස්ථාන පොලිසිය පවසයි.
බලංගොඩ සිට පුද්ගලයන් 71කුගෙන් සමන්විත පිරිසක් මෙම බස් රථයේ වන්දනාවේ පැමිණ ඇති අතර බස් රථය තුල සිටි අවුරුදු 47ක් පමණ වයස ඇති පුද්ගලයකු මෙලෙස ගින්නට හසුව ජීවිතක්ෂයට පත්ව තිබේ.
මෙම පිරිස ඊයේ( 21දා) සවස අනුරාධපුරයට වන්දනාවේ පැමිණ ඇති අතර ඔවුන් පූජා නගරයේ පිහිටි විශ්‍රාම ශාලාවේ නවාතැන් ගෙන ඇති අතර පසුව කණ්ඩායමක් වන්දනාවේ ගොස් තිබේ.
එම වන්දනාවේ පැමිණි පිරිස අතර එහි සිටි ආහාර පිළියෙල කරන්නකු මෙම බස් රථයේ රාත්‍රී නිදා ගෙන සිටියදී අළුයම දෙකට පමණ සිදු වූ බස් රථය තුළ සිදුවූ ගින්නෙන් ජීවිතක්ෂයට පත්ව තිබේ.
(බී.ජී. චතුරංග,රෝහණ චන්ද්‍රසා සහ කුෂාන් ජයවර්ධන)
