විශේෂ විධි විධාන මත තඹුත්තේගම ආර්ථික මධ්‍යස්ථානය විවෘතයි


ජනාධිපති  ලේකම් කාර්යාලයේ නියෝග මත තඹුත්තේගම විශේෂිත ආර්ථික මධ්‍යස්ථානය හෙට උදෑසන 5.30 ට විවෘත කිරීමට රජය කටයුතු කර ඇති බව වෙළඳ සංගමයේ සභාපති සුනිල් සෙනවිරත්න මහතා පැවසීය.

වෙළඳ සංගමය විසින් අද (05) ආර්ථික මධ්‍යස්ථානය  වසාදැමීමට තීරණය කරනු ලැබුව ද  එම දැනුම්දීමට   අනුව විශේෂිත ආරක්ෂක ක්‍රමවේදයන් භාවිත කරමින් හෙට (06) උදෑසන විවෘත කිරීමට  කටයුතු යොදා ඇති බව සභාපතිවරයා පැවසීය.

හෙට දිනයේදී ගොවීන්ගේ හා  සැපයුම්කරුවන්ගේ වාහන ආර්ථික මධ්‍යස්ථානයට පිටතින් නවතා තබා සංගමයට අයත් වාහන දෙකින් එළවළු තොග ඇතුළට ගැනීමට කටයුතු යොදා ඇති බවද සභාපතිවරයා කීය.

අද දිනයේ වසාදැමීමට සූදානම් වු එම මධ්‍යස්ථානය විශාල ගොවීන් පිරිසක් පැමිණීම හේතුවෙන් විවෘත කිරීමට වෙළඳ සංගමය පියවරගෙන තිබේ.

එළවළු තොග රැගෙන එන ගොවීන් 1000 ත්-1500 ත් අතර පිරිසක් තෙරපීම නිසා මීටරයක පරතරයක් පවත්වාගැනීමට නොහැකි වන බවද සභාපතිවරයා කීය.

කුමන හේතුවක් නිසා වත් සැපයුම්කරුවන්ගේ වාහන ඇතුළට නොගන්නා බැවින් ඊට සූදනානම්ව පැමිණිය යුතු  බවත් පැමිණෙන සියලු දෙනාගේ සෞඛ්‍ය ආරක්ෂාව තහවුරු කරන බවත් වෙළඳ සංගමයේ සභාපතිවරයා වැඩිදුරටත් සඳහන් කළේය.

Video Corner